Curtha faoi thalamh
Ar an 10 Meán Fómhair 1919, mar gheall ar an bhforéigean a bhí ag éirí níos measa agus an dúshlán méadaithe a chruthaigh sí don “the duly constituted authority”, d’fhógair údaráis na Corónach go raibh Dáil Éireann neamhdhleathach. As sin amach, ní fhéadfadh sí teacht le chéile ach amháin ó am go ham agus ní raibh láthair sheasta aici. Bhí impleachtaí marfacha aige sin ar aon uaillmhian maidir le tras-scríbhinní fíor-ama ar imeachtaí a tháirgeadh, amhail na cinn a rinneadh le Hansard in Westminster.
Ba sa timpeallacht pholaitiúil sin a thosaigh Roinn Bolscaireachta na Dála, a rinne an rud ar a dtugtar poiblíocht sa lá atá inniu ann, ar bhileog nuachta darbh ainm Irish Bulletin a chur amach. Foilsíodh an bhileog nuachta sin ó Shamhain 1919 go Nollaig 1921 agus tugadh na chéad tuairiscí fíor-ama ar ghníomhaíochtaí na Dála inti, cé nach raibh siad iomlán ná rialta. Tuairiscíodh roinnt achoimrí ar sheisiúin phríobháideacha agus phoiblí sa Dáil agus, in amanna, rinne taifeadadh ar rúin agus aithisc, le forlíontaí inar taifeadadh ráitis uachtaránachta agus foraitheanta Dála. B’iomaí alt faoi cheannaircí a bhí inti, agus ruathair agus gabhálacha Rialtas na Breataine. Go deimhin, is iomaí ruathar a rinneadh ar a hoifigí féin agus gabhadh seilbh ar a liostaí scaipthe, ar chlóscríobháin agus ar stáiseanóireacht.
Idir Samhain 1919 agus Iúil 1921, rinne Kathleen McKenna gach eagrán den Irish Bulletin a chlóscríobh. Ba ise a bhíodh freagrach freisin as an mbileog a scaipeadh ar dhaoine cairdiúla sa bhaile agus thar lear. In alt faoi mbileog, scríobh sí faoin tslí ar sheas Art Ó Gríobhtha, Deasmhumhan Mac Gearailt agus Robert Brennan, stiúrthóir Phreasoifig Shinn Féin, timpeall uirthi agus í ag tosú amach ag obair ar an gcéad eagrán:
“I put a stencil into my typewriter, typed the words: The Irish Bulletin, Vol. 1, No. 1. 11 November, 1919. The three men stood near me: three pairs of critical eyes were fixed upon my fingers as they danced unerringly over the keyboard … I fixed the stencil to the duplicator and rolled off the first clear copy; the men were delighted with it, and with themselves. The Irish Bulletin had been born.”