Is tuairisc scríofa í an Tuarascáil Oifigiúil ar gach rud a deirtear le linn suíonna poiblí de chuid Thithe an Oireachtais agus a gcuid coistí parlaiminteacha.
Ó bunaíodh í in 1922, is é an príomhchúram atá ar Oifig na nDíospóireachtaí ná Tuarascáil Oifigiúil Thithe an Oireachtais, mar atá, Dáil Éireann agus Seanad Éireann, a chur le chéile. Is tuairisc scríofa í an Tuarascáil Oifigiúil ar gach rud a deirtear le linn suíonna poiblí de chuid Thithe an Oireachtais agus a gcuid coistí parlaiminteacha. Cuimsíonn sí díospóireachtaí, ráitis, freagraí ar cheisteanna ó bhéal, vótaí agus fianaise a thugtar le linn cruinnithe coiste. Bíonn freagraí scríofa ó Airí ar cheisteanna parlaiminteacha mar chuid den Tuarascáil Oifigiúil chomh maith nó is uirlis thábhachtach iad seo do na Teachtaí agus iad ag comhlíonadh a gcuid cúraimí i dtaca leis an Rialtas a choimeád cuntasach. Ón bhfíorthús, tá Oifig na nDíospóireachtaí ag foilsiú díospóireachtaí na dTithe ina n-iomláine ar bhonn laethúil, go han-luath tar éis dóibh titim amach. Déanann an fhoireann athbhreithniú ar na díospóireachtaí laethúla seo níos déanaí agus déantar iad a fhoilsiú in imleabhair chlóite agus tugtar an Tuarascáil Oifigiúil athbhreithnithe air seo. Táthar ag súil, am éigin roimh dheireadh 2020, le go bhfoilseofar an 1,000ú himleabhar dá leithéid seo den Tuarascáil Oifigiúil Dála.