An Tuarascáil Oifigiúil a chur i dtoll a chéile i ré Theicneolaíocht na Faisnéise

Cén chaoi a gcuirtear an Tuarascáil Oifigiúil le chéile sa lá atá inniu ann?

Tá foireann tuairisceoirí, eagarthóirí agus foireann riaracháin i mbun na Tuarascála Oifigiúla i gcónaí. Tá Oifig na nDíospóireachtaí, ina raibh modhanna láimhe in úsáid den chuid is mó tráth den saol, ina timpeallacht beagnach digiteach ar fad anois.

Gach seachtain nuair a bhíonn na Tithe ina suí, bíonn na tuairisceoirí ag obair mar dhá fhoireann, agus 14 thuairisceoir ag cur na tuarascála le chéile don Dáil agus an chuid eile ag cur na tuarascála le chéile don Seanad agus do na coistí.

Glacann na tuairisceoirí ar fhoireann na Dála sealanna chun dul isteach sa Seomra agus nóta a bhreacadh síos den mhéid atá ag tarlú agus cé atá ag caint. Cuidíonn an loga sin leo níos déanaí nuair a bhíonn siad ag obair ar na codanna de na díospóireachtaí atá díreach cloiste acu, ar a dtugtar “téiceanna”. Nuair a fhilleann na tuairisceoirí ar a ndeasc i ndiaidh dóibh an Seomra a fhágáil, tosaíonn na tuairisceoirí ar thras-scríobh a dhéanamh ach éisteacht le taifeadtaí fuaime ar fhearais chinn, a sheinntear ar ais ag úsáid troitheáin nó orduithe gutha. Cé go gclóscríobhann formhór na dtuairisceoirí a gcuid téiceanna, tuairiscíonn roinnt acu orthu anois ag úsáid teicneolaíocht aitheanta gutha. Tugann bogearraí saincheaptha deis do thuairisceoirí faisnéis mar ainmneacha Comhaltaí, ceannteidil chaighdeánacha agus torthaí vótaí a chuimsiú isteach iontu, agus déantar formáidiú go huathoibríoch ar na díospóireachtaí chun a bhfoilsiú ar líne a éascú.

Nuair a bhíonn tuairisceoirí sásta go bhfuil a gcuid téiceanna curtha i gcrích, cuirtear ar fáil go leictreonach iad do Chomhaltaí agus do na meáin. Bíonn dhá uair an chloig ag tuairisceoirí chun a gcuid téiceanna a chur i gcrích, agus caithfidh siad bogadh ar aghaidh ansin chuig na chéad téiceanna eile atá sannta dóibh. Déanann na tuairisceoirí uile ar an bhfoireann é sin arís is arís gach lá go dtí go gcuirtear an Dáil ar athlá.

Fad is a bhíonn foireann na Dála ag obair leo, bíonn an dara foireann ag obair ar an Seanad agus ar na coistí. Glacann tuairisceoirí logaí lámhscríofa de dhíospóireachtaí an tSeanaid agus glacann tuairisceoirí nó an fhoireann riaracháin logaí leictreonacha de chruinnithe coiste. Cruthaítear tras-scríbhinní de dhíospóireachtaí Seanaid agus coistí ar an mbealach ceannann céanna is a dhéantar don Dáil. Ar na laethanta sin nach suíonn na Tithe, déanann na tuairisceoirí go léir tras-scríobh ar théiceanna atá fós le déanamh ón Seanad agus na coistí.

Nuair a bhíonn téic ón Dáil, ón Seanad nó ó choiste réidh le seiceáil, déanann na heagarthóirí pé athruithe is gá agus tar éis díospóireacht a sheiceáil, foilsítear é ar líne ar bhonn rollaithe. Ar an mbealach sin, cuireann Oifig na nDíospóireachtaí imeachtaí gach lá suite ar fáil ar shuíomh gréasáin an Oireachtais, áit ar féidir féachaint orthu i bhformáidí XML agus PDF araon. Ar deireadh, tar éis dul siar ar an obair arís, táirgtear an Tuarascáil Oifigiúil le haghaidh na Dála agus an tSeanaid i bhfoirm imleabhair faoi cheangal.

Cad a tharlóidh amach anseo?

Beidh tionchar i gcónaí ag teicneolaíocht atá ag feabhsú an t-am ar fad ar an gcaoi a dtáirgeann Oifig na nDíospóireachtaí an Tuarascáil Oifigiúil. De réir mar a leanann suíomh gréasáin nua an Oireachtais ag forbairt, gach seans go ndéanfar an Tuarascáil Oifigiúil agus na taifeadtaí físe d’imeachtaí a nascadh le chéile ar bhealach níos dlúithe. Tá iniúchadh leanúnach á dhéanamh ar nuálaíochtaí in aithint gutha agus i dteicneolaíocht gutha is téacs, faoi cheannródaíocht Pharlaimint na hEorpa. Ina ainneoin sin is uile, gach seans, as seo go ceann cúpla bliain ar aon nós, go dteastóidh foireann oilte a bheidh in ann tuarascáil a tháirgeadh “cé nach tuarascáil focal ar fhocal í, ar tuarascáil focal ar fhocal í den chuid is mó, ach a mbeadh aon athrá agus aon dúbailtí fágtha ar lár agus aon earráidí soiléire ceartaithe inti, ach ar an lámh eile, nach mbeadh aon rud fágtha ar lár a chuireann le ciall na hóráide nó a shoiléiríonn an argóint.”